1. Аңыз? Бала емізу оңай.

Нәрестелер анасының омырауын іздеу рефлексімен туылады. Дегенмен, көптеген аналар баланы емізу үшін жайғастыруда және оны дұрыс ауыздандыруын қамтамасыз етуде практикалық көмекке мұқтаж. Бала емізу аналарға да, сәбилерге де уақыт пен икемділікті қажет етеді. Сонымен қатар, бұл ұзақ процесс болып табылады, сондықтан аналарға оны жүзеге асыру үшін орын керек және үйде де, жұмыста да қолдау қажет.

1. Аңыз? Әдетте бала емізу ауырсынуды тудырады — емшек ұшының тітіркенуін болдырмау мүмкін емес.

Көптеген аналар босанғаннан кейінгі алғашқы бірнеше күнде нәрестені емізуді үйреніп жатқан кезде ыңғайсыздықты сезінеді. Алайда, баланы емізуге жайғастыруда және оны дұрыс ауыздандыруды қамтамасыз етуде тиісті қолдау болған кезде, емшек ұшының тітіркенуін болдырмауға болады. Егер анасы емшек ұшының тітіркенуі сияқты емізу мәселелеріне тап болса, лактация жөніндегі кеңесшінің немесе басқа білікті маманның қолдауы оған қиындықтарды жеңуге көмектеседі.

1. Аңыз? Емізер алдында емшек ұшын жуу керек.

Бала емізу алдында емшек ұшын жуудың қажеті жоқ. Туылған кезде нәрестелер аналарының иістерін және олар шығаратын дыбыстарды жақсы таниды. Емшек ұштары нәресте иісін сезетін және нәрестелерде өмір бойы сау иммундық жүйені қалыптастыруға көмектесетін «жақсы бактериялары» бар зат шығарады.

1. Аңыз? Жаңа туған нәрестені демалу үшін анасынан ажырату керек.

Дәрігерлер, медбикелер және акушерлер босанғаннан кейін бірден кенгуру әдісі деп аталатын «теріге тері» байланысын жасау тәжірибесін қолдайды. Нәрестенің терісі сіздікімен жанасатын тікелей байланыс орнату нәрестенің емшекті табуына және емуіне көмектесетін өте маңызды тәжірибе. Бала туылғаннан кейін бір сағат ішінде тиісті әрекеттерді орындау және оларды жиі қайталау емуді үйренуге көмектеседі. Егер анасы мұны істей алмаса, оның серіктесі немесе отбасының басқа мүшесі көмекке келе алады.

1. Аңыз? Бала емізу кезінде тек қарапайым тағаммен тамақтану керек.

Барлық басқа адамдар сияқты емізетін аналар да үйлестірілген диетаны ұстануы керек. Жалпы, әдеттегі рационды өзгерту қажет емес. Аналардың тамақ қалауы нәрестелерге ана құрсағында болу кезеңінен бастап әсер етеді. Егер анасы баласының өзі жейтін нақты бір тағамға реакциясын сезсе, маманмен кеңескен дұрыс.

1. Аңыз? Физикалық жаттығулар сүттің дәміне әсер етеді.

Физикалық жаттығулар пайдалы, соның ішінде емізетін аналарға да. Оның сүттің дәміне әсер ететініне сілтейтін ешқандай мәлімет жоқ.

1. Аңыз? Егер нәрестеңізді бірден емізіп бастамасаңыз, кейін емізе алмайсыз.

Босанғаннан кейінгі алғашқы сағатта емізуді бастау оңайырақ болады, себебі осы кезеңде баланың рефлекстері өте күшті. Нәрестелер емшек сүтімен тамақтануды үйренуге дайын. Егер босанғаннан кейін баланы бірден кеудеге қоймаған болсаңыз, жағдайды ескере отырып, мүмкіндігінше тезірек жасаңыз. Егер осы салада көмек қажет болса, лактация мәселелері жөніндегі білікті кеңесшімен немесе тиісті дайындығы бар басқа маманмен кеңесіңіз. «Теріге тері» және нәрестені кеудеге жиі қою бала емізуді бастауға көмектеседі.

1. Аңыз? Бала емізу сүт қоспасын қолдану мүмкіндігін толығымен жояды.

Аналар белгілі бір жағдайларда сүт қоспасын қолдану туралы шешім қабылдай алады және сонымен қатар омырамен емізуді жалғастыра алады. Сүт қоспасы және емшек сүтін алмастыратын басқа өнімдер туралы объективті ақпаратты іздеу маңызды. Емшек сүтін өндіруді тоқтатпау үшін, баланы жиі емізуге тырысыңыз. Аналарға лактация жөніндегі кеңесшімен немесе емізуді жалғастырудың ең қолайлы жоспарын құруға көмектесетін басқа білікті маманмен сөйлесу пайдалы болуы мүмкін.

1. Аңыз? Көп аналар жеткілікті мөлшерде сүт өндіре алмайды.

Дерлік барлық аналар сәбилеріне қажетті мөлшерде сүт өндіреді. Емшек сүтін өндіру баланың кеудеге дұрыс қойылуымен, емізу жиілігімен және әр тамақтану кезінде баланың сүтті қаншалықты жақсы еметінімен анықталады. Емшекпен емізу тек әйелдің ісі емес, аналарға медициналық мамандардың лактация бойынша тұрақты кеңестері, үйде көмек көрсету, дұрыс тамақтану және сұйықтықтың тиісті мөлшерін тұтыну арқылы салауатты өмір салтын сақтау сияқты қолдау қажет.

1. Аңыз? Ауырып қалған жағдайда баланы емізуге болмайды.

Бұл аурудың түріне байланысты, бірақ әдетте аналар ауырған кезінде емізуді жалғастыра алады. Сіз емделудің дұрыстығына көз жеткізіп, демалып, жақсы тамақтанып, жеткілікті сұйықтық ішуіңіз керек. Көптеген жағдайларда ағзаңыз аурумен күресу үшін шығарған антиденелер балаға беріліп, өзінің қорғаныс жүйесін жасайды.

1. Аңыз? Емізу кезінде ешқандай дәрі қабылдауға болмайды.

Дәрігерге бала емізетіндігіңізді және рецептсіз сатып алатын кез-келген дәрі-дәрмектің нұсқауларын оқып шығу маңызды. Дәрі-дәрмектерді белгілі бір уақытта немесе белгілі бір дозада қабылдау немесе препаратты ауыстыру қажет болуы мүмкін. Сонымен қатар, сіз қабылдаған барлық дәрі-дәрмектер туралы баланың дәрігеріне хабарлауыңыз керек.

1. Аңыз? Еметін балалар анасына тым жақын.

Әр бала әртүрлі. Кейбіреулер анасына тым жақын, ал кейбіреулері керісінше, және бұл олардың қалай тамақтанатынына байланысты емес. Емшекпен емізу нәрестелер үшін жақсы тамақтануды қамтамасыз етіп қана қоймайды, сонымен қатар олардың дамып келе жатқан миы үшін үлкен маңызға ие. Емшек сүтімен қоректенетін нәрестелер ұзақ уақыт бойы қолда болады, осыған байланысты емшек сүтімен емізу анамен байланысты нығайтады деген қорытынды жасалған.

1. Аңыз? Егер нәрестені бір жылдан астам уақыт емізсеңіз, емшектен шығару қиын болады.

Бір жылдан кейін емізуді тоқтату қиын екендігі туралы деректер жоқ, бірақ баланың екі жасқа толғанға дейін емізудің жалғасуы аналарға да, нәрестелерге де пайдалы екендігі туралы дәлелдер бар. Барлық аналар мен нәрестелер әртүрлі және емізудің қажетті ұзақтығын бірге анықтауы керек.

1. Аңыз? Жұмысқа оралған жағдайда баланы емшектен шығаруға тура келеді.

Аналардың көбісі жұмысқа оралғаннан кейін емшек емізуді жалғастырады. Ең алдымен, жұмыс орныңызда жүргізіліп жатқан саясатты зерттеуіңіз керек. Егер жұмыс уақытында емізуге уақыт пен орынға құқығыңыз болса, үйге барып, балаңызды емізе аласыз, отбасы мүшесінен немесе досыңыздан емізу үшін баланы сізге әкелуді/әкетуді сұрай аласыз. Егер жұмыс уақытында емшекпен емізе алмасаңыз, емшек сүтін сыздықтап шығаруға мүмкіндік іздеңіз, содан кейін үйге келгенде баланы емізіңіз. Егер нәрестеге емшек сүтін алмастырғышты беруді шешсеңіз де, баланың жанында болған барлық жағдайларда бала емізуді жалғастыру өте маңызды рөл атқарады.